მარტს სიურპრიზები უყვარსო ნათქვამია და ეს ყოველ წელს დასტურდება ბუნების მიერ.
წელს ჯერ უჩვეულოდ თბილი ამინდებით გაგვანებივრა და გაგვახარა, მერე კი სამდღიანი წვიმები მოულოდნელი სიურპრიზით დააგვირგვინა.
იმხელა ფანტელები წამოვიდა შაბათს დილიდან, რომ თელაველებს თავი ზღაპარში გვეგონა.
გამოვიდა დიდი თუ პატარა გარეთ, ფოტოგრაფებს მუხტი და ენერგია მოგვმატა თოვლმა და ვინც ქალაქში ვიყავით ყველა გამოვეფინეთ ქუჩებს.
მე ცოტა დამაგვიანდა და გამოსვლიდან 10 წუთში დიდი ფანტელები შეწყდა. თუმცა მივიღე რაღაც განსხვავებული - შემორჩენილი და წყლად ქცეული თოვლის კომბინაცია ქუჩებში. გადავიღე ბევრი და მივხვდი, რომ მომნატრებია ამ ჯადოსნურ ქალაქში ხეტიალი.
თელავში კამერით ხეტიალმა ისე გამახარა, ძველი მოგონებები ამიშალა და აგერ დამაბრუნა კიდეც ბლოგზე, რომელიც 5 წელია არ გამიხსნია.
იმედია ეს მოტივაცია არსად წავა და უფრო ხშირად დავწერ ან გადავიღებ ამ ბლოგისათვის და თქვენთვის, ვინც ახლა ამას კითხულობთ. <3
